December 5, 2009

အသည်းစကား ပြောချင်တယ်

မြန်မာတို့ ၏ “ အသည်း”နှင့် ဂျပန်တို့၏ “အသည်း”


မြန်မာလို “အသည်း” ဆိုတဲ့ စကားလုံးဟာ အသုံးများပြီး ၊ အသံကြားတာနဲ့ စကားလုံးမူရင်းအဓိပ္ပါယ်
အပြင် တင်စားသုံးနှုန်းထားတဲ့ ဆိုလိုရင်းကို ခံစားလို့ရတဲ့ဝေါဟာရတစ်ခုဖြစ်ပါတယ်။

ကိုယ်ခန္ဒာအစိတ်အပိုင်းတစ်ခုအနေနဲ့ ပြောတဲ့အခါမှာ အသည်းကြီးရောဂါ၊ အသည်းရောင် အသားဝါ ရောဂါ ၊ စသည်ဖြင့်ပြောဆိုကြသလို၊ “ကိုယ့်အသည်းလေး” “သူ့ရဲ့ အသည်းလေး” “အသည်းကွဲ တိုးရစ်စ်ကြီး” “အသည်းမခွဲပါနဲ့” ဆိုပြီး လူတစ်ယောက်ရဲ့အရေးအကြီးဆုံး အမြတ်နိုးဆုံး အရာတွေကို ပြောချင်တဲ့ အခါ၊ စိတ်နှလုံး ခံစားချက် သဘောထားတွေကို ပြောတဲ့အခါမှာလည်း တင်စားသုံးနှုန်းကြပါတယ်။

ဒီနေရာမှာ ပြောချင်တာကတော့ ဂျပန်ဘာသာမှာ “အသည်း” ကို မြန်မာဘာသာလို ကိုယ်ခန္ဒာအစိတ်အပိုင်း အဖြစ်ကော တင်စားမှုအဖြစ်ပါ တစ်ခုတည်းသော ဝေါဟာရနဲ့ သုံးနှုန်းတာမတွေ့ရဘူးဆိုတာကိုပါ။
ဂျပန်ဘာသာနဲ့ သုံးနှုန်းပုံကို ဒီလိုတွေ့ရပါတယ်။

ခန္ဒာကိုယ်အစိတ်အပိုင်း “အသည်း”ကို ဂျပန်လို “ရှင်းဇိုး 心臓 ” လို့ခေါ်ပြီး ၊
တင်စားမှုအသုံးအနှုန်း “အသည်း” ကို တော့ အင်္ဂလိပ်လို heart ကိုသုံးတာကိုတွေ့ရပါတယ်။ ဂျပန်လိုအသံထွက်တဲ့ အခါ “ ဟားတို” လို့ဖြစ်နေပါတယ်။ အသည်းပုံ ဆိုတော့ “ဟားတို ဂါ့တာ” “ဂါ့တာ့” က “ပုံသဏ္ဍန်” ပေါ့။ နောက်တစ်ချက်ကတော့ အစားအသောက်တွေအနေနဲ့ ကြက်အသည်း ၀က်အသည်းကိုကျပြန်တော့ - အင်္ဂလိပ်လို liver ကို သုံးတာတွေ့ရပါတယ်။ ဂျပန်လို အသံထွက်တော့ “ရက်ဘား” လို့ ဖြစ်သွားပါတယ်။

ဂျပန်ဘာသာကတော့ ထုံးစံအတိုင်း စည်းကမ်းကြီးလိုက်တာလို့ ပြောရမလားပဲ ။ သတိထားပြီးပြောရတာများပါတယ်။ နေရာခွဲပြီးသုံးတယ်လေ။ ဥပမာ-ကြက်အသည်းကို “ချစ်ကင်း ဟားတို ” လို့ ပြောမယ်ဆိုရင် တစ်ခုခုမှားနေသလို ကြားလို့နားထဲမှာ နားထောင်လို့မကောင်းဘူးနော်။ “ကျွန်မရဲ့ ရှင်းဇိုး”လို့ပြောပြန်ရင်လည်း ၊ ကဗျာမဆန်ပဲ သွေးခုန်လည်ပတ်နေတဲ့ ရင်ဘတ်ထဲက နှလုံးပုံကြီးကို မြင်ရောင်မိတော့မယ်လေ။

ကျွန်မတို့မြန်မာဘာသာ နဲ့ “အသည်း”ကတော့ ဝေါဟာရ တစ်မျိုးတည်းနဲ့ အဓိပ္ပါယ်အမျိုးမျိုးဆောင်တဲ့ အပြင် နဂိုမူလ ဝေါဟာရ ဖြစ်တဲ့ ခန္ဒာကိုယ်အစိတ်အပိုင်း ရဲ့ အခေါ်အဝေါ်ကို ခန္ဒာကိုယ်အစိတ်အပိုင်း လောက် အရေးကြီးမှု နဲ့ တင်စားမှုအဖြစ်သုံးနိုင်တာကိုပါတွေ့ရလို့ ပြောရဆိုရတာ စိတ်ကျေကျေနပ်နပ်ရှိလှပါတယ်လို့ တွေးရင်း ဒီပို့စ်လေးကို ရေးလိုက်တာပါ။

ရင်ထဲမှာလည်း “အသည်း” ။ ချစ်ရသူကိုလည်း “အသည်း” ။ ဟင်းချက်စားတော့လည်း “ကြက်အသည်း” “၀က်အသည်း” အားလုံးတစ်မျိုးတည်း နဲ့ အဆင်ပြေတာကတော့ မြန်မာတို့ ရဲ့ “အသည်း ” လေး ပေါ့နော်။

စာဖတ်သူကော “အသည်း” နဲ့ ပါတ်သက်ပြီး ပြောစရာများရှိပါသလားရှင်။



ဓါတ်ပုံကိုကူးယူရာနေရာ
http://image-search.yahoo.co.jp/search?ei=UTF-8&p=%E3%83%8F%E3%83%BC%E3%83%88

4 comments:

ကိုမျိုး (အညာမြေ) said...

မင်္ဂလာပါ..

အသည်းစကား ပြောကြစို့။ ဟဲ..ဟဲ။ "မွေးမေပေးသော အသည်းကို ယူကာ၊ ကလျာနွဲ့နှောင်းဆီ အပြေးလာခိုက်ဝယ်၊ ခရီးလမ်းမ နွေအလယ်၊ ခလုပ်ကန်သင်းတိုက်ခါလဲတယ်၊ အသည်း နှလုံးက စကားပြောလာပြီကွယ်...".. "သား..လူလေး..ဘယ်နား နာသွားသေးလဲဟင်....".. "ဒူးခေါင်း".. မှောက်ရက်လဲလို့။
....
ဟုတ်ပ.. ကိုယ့်ဘာသာစကားနဲ့ ကိုယ်ဘဲ ပြစ်ပြစ်နှစ်နှစ် ပြောလိုက်ရမှ အားရတာ။ ရွာက အဒေါ်ကြီးကို သတိရတယ်..အသည်းဆိုလို့။ ဒေါ်ကြီး.. ရုပ်ရှင်မင်းသား အံ့ကျော်ကြီးကို ကြိုက်လား ဆိုတော့.. "အမလေး.. အံ့ကျော်ကြီးက ငါ့ အသည်းစွဲ၊ အသည်းကြော် ကြီးတော့".... ၀င်းဦး ရော ဆိုတော့.. "၀င်းဦး ကိုတော့ အသည်းပေါက်မတတ်ချစ်တယ်" တဲ့
.....
ခင်မင်လေးစားစွာဖြင့်
ကိုမျိုး (အသည်းမြေ)..မှားလို့.. (အညာမြေ)

နေ့အိပ်မက် said...

ဟတ်တိုထက် ခိုခိုရော့(kokoro) ကိုပိုသုံးတယ်မဟုတ်ဘူးလား နှလုံးသားက အသည်းထက်ပိုလှသလိုလို (ထင်တာပြောပါတယ်)

Myanmar Good Knowledg Co., Ltd said...

နေ့အိပ်မက်ရေ။
ခိုခိုရိုကို လည်း သုံးပါတယ်။ “အသည်း”ဆိုတာပြောဘို့ဆိုတာထက် စိတ်နှလုံးကိုပြောချင်တဲ့အခါတွေမှာပိုအသုံးများပါတယ်။ အခုလို ပြန်လည်သုံးသပ်ပေးတာ ကျေးဇူးတင်ပါတယ်နော်။

Myanmar Good Knowledg Co., Ltd said...

စာကြွင်း
ခိုခိုရို နှင့်ပါတ်သက်ပြီး စာကြွင်းအနည်းငယ်ဖြည့်စွက်ပါတယ်။
心=こころ=kokoro=mind, feeling, mood,sensation
心からのため息=heartfelt sigh
心からメッセージ=heartfelt message
心からのおわび=apology from the bottom of the heart
ဝေါဟာရအသုံးချခြင်း အနေနဲ့ ပြောရရင် ၊စကားလုံးကို သုံးမယ့် အခြေအနေပေါ်မှာ မူတည်ပြီး၊ ဘာသာပြန်ခြင်းအနေနဲ့ ပြောရရင်တော့ တိုက်ရိုက်ဘာသာပြန်ခြင်း (သို့)ရသမြောက် ဘာသာပြန်ခြင်း တို့ကနေ အသုံးချ ဘာသာစကားပြောင်းလဲမှုများ ရှိနိုင်ပါတယ်။